Cerpen
Oleh Adji Subela
Kampung Rawa yang biasanya adem-ayem aja, belakanganini rada-rada rungsing. Ibu-ibu rumah tangga bawaannya renyem, malah ada yang maunya bekaokan mulu kayak orang kesambet jin baghdad. Ini semua gara-gara kehadiran janda muda yang lumayan bahenol, yang ngontrak di rumah bedeng punya Haji Mamid.
Saban pagi anak-anak sekolah yang laki pada bererot ngintipin kamar mandi si janda muda. Kalu dianya pergi mau kerja kek, mau ke pasar kek, mereka pada ngintilin jauh dari belakang kayak laler kurang kerjaan. Si janda itu Isah namanya, emang bener-bener resep diliatinnya. Senyumnya percis kayak Britney Spears, bodinya boto, boncengannya radial. Rambutnya bole dibilang ikel mayang. Kapan dianya lewat di jalan atawa di gang, baunya minyak wangi Air Mata Duyung ngeluber ke mana-mana. Bau parfum itu jatuhnya kayak minyak si nyong-nyong aja, bikin muka nyureng jadi jembar, muka sepet jadi rada-rada terang dikit.
Tetangga seberang rumah si Isah namanya Bang Nasir, yang dulunya kerjaannya molot mulu di pangkeng. Dianya paling males berangkat kerja di bengkel Asiong. Padahal bininya paling seneng begaya ama tetangga soal pendapetannya si Nasir. Sewaktu bininya ngridit tempat tidur ati-ati, dia orang sewot bener. Rasanya Bang Nasir gedek bener, gara-aa gajinya kudu disempalin tiap bulannya, walhasil penghasilan bulanannya menciut. Mangkanya Bang Nasir lantas ngambek, pindah molor ke bale bandeng semben ngeronda. Ini sebenarnya taktik Bang Nasir aja. Maunya tiep pagi dia ngintip di Isah berangkat kerja. Terkadang Bang Nasir beraniin diri nemplok di jaro kayak keong racun, sembari nyengir kayak kuda ketelek biji nangka. Si Isah sih cuman mesem malu-malu kucing doang, tapi bikin ati Bang Nasir kayak kesebrot sampi bener-bener. Ini dilakukan diem-diem, sebab Bangs Nasir takut diseblok aer dari belakang ama bininya yang kesohor galak kayak macan beranak. Ini cuman permulaan doang.
Berikutnya, si Adul ama Duloh ikut-ikutan pasang gaya. Sebelon si Isah masup Kampung Rawa, cowok-cowok geblek itu paling males kalu disuru bangun pagi. Tapi sekarang ini tiep pagi Adul ama Duloh udah berebut tempat di pos ronda prapatan jalan, mejeng abis-abisan. Boro-boro kena tegor, dilirik aja mereka juga kagak. Tapi lagu Adul ama Duloh percis bajidor Krawang turun joged. Si Duloh yang matanya belok kayak burung celepuk, belakangan punya pantasi kebangetan. Dia orang pikir, si Isah bakalan ngedeprok di pangkuan dia. Pasalnya, dia punya tampang rada mendingan tibang si Adul.
“Ude deh, gue jamin si Ise bakalan betekuk lutut ame gue dalem tempo sebulan. Kalu kagak kebukti gue kasi elu-elu pade serebu perak kontan tiep kepale,” Duloh bekoar ama temen-temen kampungnya, kagak ngukur beroknya. Angan-angannya udah melayang ke sono ke mari. Dia percaya bener dalem tempo dua minggu, paling lama sebulan, depan rumahnya bakalan di pasangin plampang buat pesta nikahnya ama si Isah. Tapi buktinya, udah sebulan lewat si Isah tetap aja melengos kalu liat Duloh. Temen-temennya pada ketawa ngakak, tapi Duloh puguh kagak mau ngebayar tarohannya. Terang aja si Mi’un sukang buah sewot bener. Dia paranin si Duloh dan ampir aja si Duloh dikemplang pake lang dagangannya. Untung aja teman-temannya pada misahin.
Laen Duloh laen lagi si Adul. Dia pikir, tibang bekutetan di pos ronda kagak ketahuan juntrungannya, dia pengin pasang taktik jitu. Entar abis bulan dia orang mau kasih si Isah karangan kembang anggrek yangbakalan dia ambil dari kebon punya Encang Amat dari Rawabelong. Pas tiba arinya, Adul udah ngejentul di deket pos ronda, pasang aksi memeluk karangan bunga anggrek. Bener juga perkiraannya. Kagak begitu lama, si Isah keluar rumah ayun dengkul lengkat-lengkot kayak macan kelaperan.
“Sah, nih gue kasih karangan bunga anggrek buat elu. Bengkali aje lu demen ame anggrek ini. Pan lumayan buat pajangan kantor,” kata si Adul sembari ngasongin karangan bunga anggrek dari Rawabelong, “biar begini, nih bunga dari kebon encang gue diri di Rawabelong.”
“Oh iye aye mekasih ye Bang,” sahut si Isah.
Si Adul senengnya kagak ketulungan. Dia orang yakin bener si Isah bakalan jato ati kelojotan ama dia. Bukankah perempuan akan luluh hatinya bila diberi bunga? Begitu kata peribasa. Ati si Adul berbunga-bunga. Si Isah berusin langkah lenggang-lenggok ampe ilang di ujung gang. “Duile, gile bener, gue maungomong ai lap yu ame si Isah aje ampe lupa! Cialat! Gue kudu ngomong sekarang nih. Kapan lagi?” kata si Adul. Buru-buru dia udak si Isah ke ujung gang. Pas nyampe di pengkolan gang, di situ terdapat tong sampah milik RW. Nah, kebetulan mata si Adul ngeliat tong itu. ternyata kelihatan di dalemnya ada karangan bunga anggrek dari Rawabelong yangbarusan dia kasih ama si Isah. Dia peototin bener-bener kembang apes itu, dan emang bener itu barang yang barusan dikasinya.
“Sialan, kejem bener si Isah nih,” kata si Adul sembari ngeplakin kepalanya sendiri.
********
Pendeknya, gara-gara kehadiran si Isah, terjadi perubahan besar-besaran di Kampung Rawa. Para lelaki yang dulu-dulunya kagak pernah kenal parfum lantas sekarang udah paseh bener nyebut minyak wangi cap Aer mata Duyung, minyak Srimpi, minyak misik, yuparon dan laen-laen. Rambutnya juga pada bekilap, digosokin ama lavender cap Kompa. Para lelaki jadi ganjen, keteknya yang biasanya bau asem sekarang wangi-wangi. Digosok ama bedan cap Mawar. Warung klontong Aguan yang tadinya sepi-sepi aja, sekarang ketiban rejeki, perabotan kosmetiknya pada ludes diutangin ama para tetangganya.
Lama-lama perubahan itu diendus juga ama para perempuan Kampung Sawah. Ibu-ibu rumah tangga pada kaget setengah mati, ngeliatin lakinya sekarang pada necis kayak bintang pilem. Sebagai perempuan, akhirnya pilingnya yang bicara. Mereka curiga kenapa para laki pada kesiangan, apalagi malem minggu, cowok-cowok bangkota itu pada ngerumpi di pos ronda. Kagak taunya, di sana ada perlombaan adu cepet ngegaet si Isah. Belakangan para perempuan itu tahu juga ini semuanya gara-gara si Isah, si kembang Kampung Rawa.
Berdasarkan musyawarah bersama, akhirnya terpilihah Bu Sopiah yang ditunjuk sebagai intel, buat menyusup nyari informasi soal si Isah.
“Iye bener Bu Sopiah aje, soalnye bawaannya enak, begaulnya juga sip,” kata Bu Nasir. Kagak nunggu lama-lama, pada ari berikutnya Bu Sopiah udah nganjang di rumah si Isah. Dua orang itu asyik betul ngobrolnya ampe tiga jam kagakkeluar-keluar juga. Besok sorenya, para ibu rumah tangga pada ngerumpi lagi mendengarkan hasil inpestigasi Bu Sopiah.
“Lu pade tahu enggak. Si Isah ini nih, nasibnye benar-bener sial deh. Die ternyata yatim piatu, idup sendirian di kampung kite. Gajinye kagak cukup tibang makan doang, padahal kontrakan Haji Maid kagak ketulungan mahalnye. Die kagak punya siape-siape, abangnye baru aje mati ketabrak kereta di Jombang. Adiknye lagi dirawat di rumah sakit Sebeset, sakit kanker kagak sembuh-sembuh. Kalu malem die orang suka nangisin nasibnye nyang jeblok bener,” begitu Bu Sopiah nyerocos nryitain nasib di kembang mayang. Mpok Ijah yang tadinya suka ngecoprak, lantas bungkem delok-delok, dengerin kisah sedih itu. Perempuan laennya juga pada larut dengan kisah sedih itu. Singkat kata, dia-dia orangsepakat ngumpulin duit buat ngebantu ngeringanin beban penderitaan si Isah. Tekumpullah dana lima puluh ribu perak.
Cilakanya, kisah sedih si Isah bocor juga ama para laki mereka. Dasar lagi pada kemaruk, diem-diem para laki bikin kongkurensi. Biar kata rata-rata pegawe partikelir, mereka maksain diri nilep duit setoran buat bini masing-masing. Si Adul nilep lima ribu perak, dengan alesan buat nyelawat temen yang bininya koit kena flu burung. Duloh belagak menyumbang dana kemanusiaan tsunami sepuluh ribu perak, walhasil, rumah tangga Kampung Rawa bulan ini pada tekor. Pertama disunatin ama laki masing-masing, keduanya ditilep ama para bini buat ngebantuin si kembang mayang.
Bu Sopiah nganjang lagi ke rumah kontrakan Isah, bererot ama para ibu-ibu rumah tangga buat menyampaikan sekedar tanda simpati. Kagak beselang sejam mereka ninggalan kontrakan si Isah, Adul udah ngongolin mukanya di pintu kontrakan, bikin si Isah kaget setengah mati.
“Ade ape Bang?” tanya si Isah takut disemprot gara-gaa ngebuang karangan bunga anggrek. Dasar si Adul, ditegor cewek boto mukanya kontan mengkeret kayak tikus kecebur got.
“Enh, ehh, gini Sah gue denger elu kesulitan duit. Nih gue bantu dikit,” sahut Adul.
“Aduh Bang, kagakusah repot-repot deh aye....,” belon lagi si Isah abis ngejawab, Adul langsung maen samber aja, “Ah, kagak Sah, gue cuman ngebantu dikit.” Lagi-lagi sebelonya si Isah mangap lagi, Adulk langsung naroh buntelan duitnya di daka jendela, lantas ngibrit kagak noleh-noleh acan.
Lagunya Duloh laen lagi. Pakai pasang tampang macam Jango, dia paranin si Isah nyang mau nyapu pekarangan. Belagak kayak Don Juan van Bell, dia orang langsung kacak pinggang bari nanya: “Sah, gue denger elu ade masalah duit. Nih, abang bantuan dikit ye, jangan kagak diterime, biar dikit juga. “Belon abis kalimatnya, Culoh mau coba-coba mbeselin duit di dada Isah. Cewek boto ini nampol tangannye Duloh kekagetan. Amplok si Duloh jato. Ngeliat gelagat yang kagak resep, Duloh buru-buru ngacir takt dituduh percobaan pemerkosaan. Ketua RT setempat ternyata ikut-ikutan kelibet masalah cewek boto itu. Diem-diem dia paranin rumah Isah sembari ngempit map tebel, biar dibilang lagi tugas mendaptar pilkada. Isinya? Lagi-lagi amplok isi duit, lebi tebel tibang di Adul punya.
Begitulah bulan berikutnya kejadian berulang, dan timbullah ekses. Perempuan-perempuan pada nyap-nyap gara-gara duit setoran tetap bekurang. Masing ada aja teman kantor nyang koit, sumbangan stunami, terus ada lagi yang bilang buat dana taktis pilkada. Keributan meleduk dimasing-masing rumah, perempuan-perempuan bekaokan kagak ketulungan.
Sementara itu para lelaki mingkin begaya, wangi-wangi dan udah ada nyang nyabanin salon banci di pinggir kampung, mau ngegincuan rambutnya biar kayak artis sinetron. Tiep sore laki-laki pada ngumpul di pos ronda nungguin si kembang mayang pulang kerja. Begitu si Isah liwat, mereka lagunya pada blingsatan. Ada nyang pasang aksi macem cover boy. Ada yang maen tegor pake basa Inggris. “Helo darling hau a yuuuu....”
Buset deh. Kampung Rawa sekarang berobah total jadi audisi cowok ideal en keren. Sementara di rumah masing-masing, anakbininya pada gegerundel gara-gara pendaringan pada kosong, tagihan rekening bejibun.
Sampe tibalah saatnya. Sore-sore para laki bangkotan bin ganjen itu lagi ngerumpi di pos ronda kayak biasanya. Tau-tau dari jau keliatan ada mubil merci ngegelinding masup kampung. Suara mesinnya kagak kedengeran, melindes pulisi tidur kagak berayun acan. Semuanya pada melongo. Nyampe di depan kontrakan si kembang mayang, mubl brenti, pintunya ngejeplak. Buset. Si Isah nyang nongol dari mubil lantas maen ayun dengkul lenggat-lenggot dikintilin ama oom-oom nyang pitak kepalanya.
Kagak lama si Isah keluar lagi sembari bererotan ngangkut koper, lantas masup ke mubil lagi. Tiba giliran mucil liwat di deket pos ronda, lantas brenti, kaca jendelanya ngablak. Keliatan siIsah nyengir sembari bilang, “Mmekasih ye abang-abang semuenye, semoga Alloh kasi balesan ame kebaekan abang.....” Mubil terus ngeloyor ilang di ujung gang. Haji Mamid lantas dateng ke rumah kontrakan si Isah, ngunciin pintunya.
Urusannya udah jelas, si Isah keliatannya udah pindah dari Kampung Sawah. Kagak jelas, si Isah bakalan nempatin kondominium sebelah mana.
Semua-semua manusia nyang ada di pos ronda pada bengong kaya kena sambet. Si Adul tampangnya empet bener kaya kebo ngeden, inget sumbangan tempo ari. Mata si Duloh mingkin belok, Bang Nasir udah siap-siap bakal kena seblok aer comberan.
“Mangkenye...pakek tuh otak udang. Gare-gare jande mude melayang deh dana taktis....,” Begitu tereak orang nyang sedari dulu udah curiga ama lagak-lagunya si Isah.
TAMAT
Komentar
Posting Komentar