Betawi bukan cuman Kerak Telor doang, Cing!

Betawi bukan cuman Kerak Telor doang, Cing!
Oleh Adji Subela

Sedih bener dengerin pernyataan orang soal Betawi. Kagak ada kemajuannya, serba klise stereotipe melulu. Katanya orang Betawi tersisih, makanannya terpinggirkan.
Bengkali dari soal tanah emang bener begitu. Tapi masak iya orang Betawi digambarin bodoh melulu. Kagak, cing. Sebenernya nih, banyak orang Betawi jadi tokoh. Contoh besarnya ya M.H. Thamrin. Di jaman sekarang ini udah kagak kehitung orang Betawi jadi intelektual. Banyak yang jadi jenderal seperti Mayjen TNI (Purn) HM Djaelani, Mayjen TNI (Purn) Adam Damiri dan laen-laennya.
Nyang jadi dokter ame tukang engsinyur kagak keiitung, begitu juga pilot di perusahaan besar, nyang jadi direktur perusahaan negara, swasta dan asing juga banyak. Yang jadi peneliti di berbagai lembaga ilmiah juga banyak. Liat tuh Ikrar Nusa Bhakti, dan laen-laennya. Apa itu enggak bisa dibilang maju? Sedeng Gubernurnya sendiri sekarang juga keturunan Betawi. Pengusaha Betawi juga banyak. Nah, kalu dibilang orang Betawi ketinggalan terus, itu bengkali kurang informasi atawa emang mau jual Betawi sebagai suku ketinggalan, miskin permanen, biar dapet obyekan. Duileeh segitunye.

Bayangin, soal gegaresan aja, orang ketinggalan inpormasi. Setiap kali ulang taon Jakarta yang diasongin cuman kerak telor melulu, seolah-olah cuman itu doang penganannya. Stasiun tv Trans-7 tanggal 22 Juni sore cerita, katanya kerak telor kian tersisih. Astagfirullah aladzim. Tersisih apenye Cing? Kue ini kian “moncer” tau kagak? Lah ente diri yang ngelaporin kalo di musim PRJ banyak orang Garut jualan tuh kue. Artinya pasar tambah banyak kan? Liat dong pada hari-hari biasa aja, di mal-mal banyak yang jualan kerak telor. Ini jau lebih maju dibandingin tahun 80-an dulu.
Nyang bikin empet, kerak telor seolah-olah jadi satu-satunya kue Betawi. Astagfirullah aladzim, teliti dong. Sekarang ini kalu orang pelesiran ke Museum Sejarah Jakarta, bakal liat orang jualan es selendang mayang. Di Petak Sembilan tepatnya Kalimati, banyak orang jualan es khas Betawi ini, begitu pula di Serpong atau Bintaro. Orang mulain kenal kuliner Betawi asli.
Sebenernya banyak bener kue khas Betawi, sebut aja akar kelapa, kembang goyang, aliabegente, kue rangi, pancong, kue lempeng, legodo (cempedak goreng), podeng cempedak, kue abuk, jongkong, sengkulun, dan masih segudang lagi nyang laen.

Masakan Betawi
Masakan Betawi juga mulain populer. Jangan bilang sayur asem ame gado-gadonya yang dari dulu emang sedep. Sayur asem aja ada yang sayur asem kuning, juga sayur kelapa kelor. Sangking populernya, gado-gado Jakarta dibikin lagu kroncong dan jadi acara populer di RRI Stasiun Pusat Jakarta bertahun-tahun dan brenti akhir era 70-an. Soto kaki kambing Betawi khas Tenabang populer bener ampe ke luar kota segala.
Ada juga masakan yang sekarang jadi buruan orang seperti gabus pucung. Ikan gabus yang dimasak pakai keluwak (pucung) populer baek di Betawi tengahan ampe pinggiran.
Gorengan kambing yang sedep gurih bener rasanya sampai tahun 2000-an masing ada di Bendungan Hilir. Namanya sih gorengan kambing tapi ujudnya sayur daging kambing bandot berkuah setengah gulai setengah kare. Enak betul. Sayangnya sekarang ilang dari tengah kota Jakarta. Tiap Lebaran kita kenal sayur besan, yang biasanya dibawain ama menantunya buat ngirimin besan.Semur Betawi juga cukup populer biar daerah lainnya juga ada.
Ayam panggang Meester dulu terkenal, begitu juga sate Nyoo Kim Pul, perdekel Nyonya.
Ikan peda merah jagung pipil plus pete jadi topnya mertua Betawi. Enak bener deh. Soal sambel aja, Betawi punya macem-macem jenis kayak sambel Mayoor, sambel Babu, dan laen-laennya. Pendek kata tiap daerah di Betawi punya masakan khas, apalagi resep keluarga yang diberikan turun-temurun.

Mau apa?
Sebenernya sih kalau kuliner Betawi asli tiu digali, pasti lama-lama banyak penggemarnya juga. Emang bener, buat ngenalin ke publik bakalan ribet, lama, perlu usus kesabaran nyang panjang. Nyang kite arepin, ade lembaga baek pemerintah atau non-pemerintah mau nyeponsori promosi kuliner Betawi ini, biar populer lagi, biar perlu waktu.
Nah, siape nyang peduli? Ade anak mude nyang mau bekeringat berjuang ngenalin kuliner Betawi? Insya Allah sih ade juga.

Betawi bukan cuman Kerak Telor doang, Cing!

Betawi bukan cuman Kerak Telor doang, Cing! ditulis oleh
10/10 based on 10 ratings from 10 reviewers
Ayo berkomentar dengan baik!
Komentar menggunakan sistem moderasi. Gunakan nama asli / alias untuk berkomentar, bukan judul post atau nama produk. Komentar dengan link mengarah ke post / produk mungkin tidak akan ditampilkan. Berkomentarlah dengan bahasa yang sopan, terima kasih.

0 comments:

Posting Komentar